Archive - Нарăс 2014

Нарăс уйăхĕн 25-мĕшĕнче Чăваш Енре халăха цифра телекуравĕн ыйтăвĕсемпе консультаци пулăшăвĕ паракан центр уçăлчĕ. Çавăн пекех республикăра DVB-T2 стандартлă эфир цифра телекуравне тест режимĕпе хута ячĕç.

Мероприятие ЧР информаци политикипе массăллă коммуникацисен министрĕн çумĕ Алексей Новиков, «Раççей телекуравпа радиохыпарлав сечĕ» /РТРС/ ФПУП филиалĕн «Чăваш Республикин радиотелекурав передача центрĕн» директорĕ Дмитрий Авербах, сумлă ытти хăна хутшăнчĕç. Çÿлерех асăннă центр Шупашкарта Радио çуртĕнче /Николаев космонавт урамĕ, 4 çурт/ вырнаçнă.

Çак кунсенче ялти пĕчĕк çеç клубра Çĕмĕрле районĕнчи Анат Кăмаша ялĕнче пурăнакансен пĕрлехи пухăвĕ иртрĕ, унта асăннă ял тăрăхĕн пуçлăхĕ 2013 çулшăн отчет турĕ. Халăх йышлă пухăнмарĕ: хĕрĕхе яхăн çын çеç, тĕпрен илсен - пенсионерсем. Учительсемпе интеллигенцин ытти представителĕ темшĕн килмен.

Пуш уйăхĕн вĕçĕнче васкаса юр ирĕлнипе пĕрлех культура ĕçченĕн кунне паллă тăватпăр. Тăван республикăн культура отрасльне ултă театр, виçĕ концерт организацийĕ, патшалăх, муниципалитетсемпе ял тăрăхĕсен музейĕсем, 554 библиотека, 817 культура учрежденийĕ, музыкăпа искусствăн 48 шкулĕ, вĕрентĕвĕн тăватă учрежденийĕ кĕреççĕ. Чимĕр-ха, писательсен те пулмалла мар-и-ха культура тытăмĕнче?

Тăван çĕр-шыв хÿтĕлевçин кунĕ умĕн статистиксем Раççей халăхĕн 2010 çулхи çыравĕн кăтартăвĕсене тĕпе хурса Чăваш Енĕн вăтам арçыннин сăнне уçăмлатма шухăшларĕç. Мĕнлерех вăл?

Тÿрех палăртмалла: пирĕн республикăри арсем хăйсемпе интереслентерме пултараççĕ: кашни 1000-шĕ пуçне 1148 хĕрарăм тивет. Вĕсен йышĕ 579 пинпе е халăхăн 47 проценчĕпе танлашать. Пысăк пайĕ /58 процент/ - хула çынни, чи йышли - вăй питти ÿсĕмрисем /390 пинĕн е 67 процент/, чи сахалли - ĕçлеме пултараслăх ÿсĕмĕнчен аслăраххисем, унашкаллисем 78 пинĕн /14 процент/.

«Олимпиадăри çитĕнÿсем пире тăван çĕр-шывăмăрпа, унăн хăвачĕпе мăнаçланма май пачĕç», - тенĕ РФ Президенчĕн федерацин Атăлçи округĕнчи полномочиллĕ представителĕ Михаил Бабич XXII хĕллехи Олимп вăййисене пĕтĕмлетнĕ май ирттернĕ канашлура.