Çĕнĕ çул хыççăнхи каникул пирки нумай кулăш çуралать. Епле канни пирки ыйтсан нумай-ăшĕ çапла хуравлать: «Ĕçе кăмăлпа çÿрекен çын пур-и вара?» Паян вулакана паллаштарас текен хĕрарăм, пĕрре те иккĕленместĕп, çирĕплетсех калĕччĕ — пур!
«Курăр-ха, курăр, топ-модель пырать!» — Шупашкарта çул урлă каçакан хĕре асăрхаса кăшкăрнă çăмăл машинăри каччăсем. Айккинчен лайăхрах курăнать теççĕ вĕт. Шăпах çак самант 15-ри Карина Смирновăна пурнăç çулне суйлама пулăшнă.