«Çĕнетнĕ аудиторисенче вĕренме кăсăклăрах»
Чăваш Ен Пуçлăхĕ Олег Николаев паян Чăваш патшалăх аграри университетĕнче пулчĕ. Унта вăл республикăри предприятисем пулăшнипе уçăлнă вĕренÿ аудиторийĕсемпе лабораторийĕсен ĕçĕпе паллашрĕ.
Акă пахча çимĕçпе улма-çырла туса илес ĕçĕн вĕренÿ аудиторине Чăваш Республикин Апат-çимĕç фончĕ пулăшнипе йĕркеленĕ. Фондăн генеральнăй директорĕ Александр Богданов пĕлтернĕ тăрăх, предприяти Чăваш патшалăх аграри университечĕпе тачă çыхăну тытать. Апат-çимĕç фондĕнче ĕçлекенсен пысăк пайĕ шăпах çак аслă шкултан вĕренсе тухнă. Студентсем ку предприятире практикăра пулса ăсталăхне ÿстереççĕ. «Çак вĕренÿ аудиторине уçнăран пирĕн ĕçтешлĕх пушшех çирĕпленĕ», — терĕ Александр Богданов. Ку аудиторире çĕнĕ сĕтел-пукан вырнаçтарнă, ăна мультимедиа оборудованийĕпе, моноблокпа, интерактивлă доскапа, ытти япалапа пуянлатнă.
Олег Николаев çавăн пекех ÿсен-тăрана хÿтĕлес ĕçĕн аудиторине, инноваци технологийĕсен лабораторине, ятарлă компьютер класне кĕрсе курчĕ. Студентсен кăмăл-туйăмĕпе кăсăкланчĕ. Çамрăксем çĕнетсе пуянлатнă аудиторисенче вĕренме интереслĕрех пуласса шаннине пĕлтерчĕç.
Унтан «Регионти АПК валли кадрсем хатĕрлес ĕçри хальхи вĕренÿ технологийĕсем: опыт тата аталану малашлăхĕ» ятпа «çавра сĕтел» иртрĕ.
Видео кунта...
Сăн укерчĕксем кунта...
Ирина КЛЕМЕНТЬЕВА. Автор сăн ÿкерчĕкĕсем.