Раççей тава тивĕçлĕ, Чăваш халăх художникĕпе Николай Карачарсковпа унăн 80 çулхи юбилейĕ умĕн тĕлпулсан чăтаймарăм - çапла ыйтрăм, «Ытла та правур, лара-тăра пĕлместĕр, хăвăр çак çула çитнине туятăр-и?» «Курава хатĕрленнĕ май канлĕхе çухатрăм, картинăсене вырăнтан вырăна куçарса çÿреме тивет, çакă канăçсăрлантарать, ытти енĕпе - йĕркеллех, чун яланах çамрăк вăл», - пулчĕ хурав.
Тăван тăрăха килмессеренех эпĕ пушă вăхăт тупса Элĕкри литературăпа таврапĕлÿ музейне кĕрсе тухатăпах. Вăл, вуншар çул каялла йĕркеленнĕскер, тĕрлĕ экспонатпа пуянланса та çĕнелсех пырать. Ку тăрăхран республикипех паллă çынсем сахал мар тухнă. Вĕсем район чысне çĕклеççĕ, ыттисемшĕн ырă тĕслĕх шутланаççĕ. Кашни валлиех уйрăм кĕтес уйăрнă музейре. Эпĕ Хитекушкăнь ялĕнчи Марковсен çемйине халалланă ятарлă стенд умĕнче чарăнатăп.