Çĕр çынпа çеç çĕнелет
«Çĕре тăван аннепе танлаштарни питĕ тĕрĕс, çавăнпа та ăна ама çури вырăнне хумалла мар», - тет Йĕпреç районĕнчи Пысăк Упакасси ял тăрăхĕн пуçлăхĕ Евгений Ерилеев. Вăл, хресчен кил-йышĕнче çуралса ÿснĕскер, мĕн ачаранах хура çĕр тивлетне, тарпа тăварланă ыраш çăкăрĕн хакне пысăк çын пекех малти вырăна хума вĕреннĕ. Ашшĕ Владимир Павлович Ерилеев «Трудовик» колхоз уй-хирĕнче «хурçă ут» çÿретсе чапа тухнăччĕ. Ун çинчен хăй вăхăтĕнче центрта тухса тăракан «Сельская жизнь» хаçат корреспонденчĕ Анна Харитонова очерк çырнăччĕ. Ку - сăмах майăн калани.