Сăнавсем

7 Ака, 2016

Сăнанинчен

  • Ака уйăхĕн 7-мĕшĕ — Пăлхавăш /Благовещени/. Çак кун кайăк та йăва çавăрмасть тенĕ. Пысăк ĕçе пуçăнма хушман ватăсем. Пăлхавăша епле ирттерен — çулталăк çапла пулĕ. Çак кун çумăрлă пулсан кăмпаллă çул пулĕ.
  • Ака уйăхĕнче çил час-часах тĕрлĕ енне улшăнса вĕрет. Çак уйăхри çилсем сивĕ пулсан та çуллана çывхартаççĕ.
  • Вĕлле хурчĕ ир вĕçме пуçлать — çуркунне ăшă тăрать.
  • Çирĕк кăчки хурăнран маларах вăранса сарăлать — çулталăк йĕпе-сапа килет, хурăн кăчки маларах сарăлать — çулталăк типĕ килет.
11 Нарăс, 2016

Халăх сăнанинчен

  • Нарăс уйăхĕ типĕ те сивĕ - çурла уйăхĕ шăрăх пулать.
  • Çил-тăман хыççăн кĕрт хĕррисем авăнса тăраççĕ - тыр-пул лайăх пулать.
  • Нарăс уйăхĕн 11-мĕшĕ тĕлне çанталăк вăйлă сивĕтсессĕн çулла шăрăх пулать.
  • Трихван кунĕ /14.02/ çĕрле çăлтăрсем вăйлă çиçеççĕ - çуркунне кая юлса килет. Çак кун хĕрсем ырă та сумлă, пуян каччă тĕлне пулма ыйтса Турра кĕл тунă.
  • 15-мĕшĕ тĕлне çанталăк ăшăтсан çуркунне ир килет, сивĕ пулсан - çуркунне хăвăрт килмĕ.
28 Кăрлач, 2016

Халăх сăнанинчен

  • Кăрлачра сивĕ, юр сахал çусан çулла шăрăх та типĕ пулĕ, уйăх уяр тăмасть - тыр-пул лайăхах пулмасть.
  • Уйăх вĕçнелле тумла пăрĕсем нумайланчĕç-и? Тыр-пул ăнса пулĕ.
  • Кăрлачра яланах юр çăвать, тăман вĕçтерет пулсан çулла çумăр час-часах çăвĕ.
  • Кăрлач мĕн чухлĕ сивĕрех - çулла пăр çăвас хăрушлăх сахалрах.
  • Ула кураксем ушкăнпа çаврăна-çаврăна вĕçеççĕ - çанталăк татах сивĕтет.
  • Сивĕре чÿрече тарлать - кĕçех ăшăтать.
24 Раштав, 2015

Халăх сăнанинчен

  • Раштавăн 25-мĕшĕнче чие турачĕсене хуçса шывлă савăта лартмалла. Раштав уявĕ, кăрлачăн 7-мĕшĕ, тĕлне чие çеçке çурма пикенет - çулталăк ăнăçлă, тухăçлă килет.
  • Раштавăн 25-мĕшĕнче çанталăк уяр тăрсан Çĕнĕ çулăн пĕрремĕш кунĕ те уяр та сивĕ пулать, ăмăр та юрлă пулсан 1-мĕшĕнче те çаплах пулĕ.
  • Уйăх вĕçĕнче çанталăк сивĕтсен Кăшарниччен - кăрлачăн 19-мĕшĕччен - çанталăк çемçелмест.
  • Юр карта çумне купаланса çыпçăнса тăрать - çулла шăрăх пулмасть.
16 Утă, 2015

Сăнавсем

  • Пыл юхтарнă чух çынна ăна çитерсен хурт хунать теççĕ.
  • Вĕлле шутне каламаççĕ, каласан - пыл хурчĕн шучĕ чакать имĕш.
  • Пыл хурчĕ ырă çыннăн çеç хунать.
  • Вĕлле хуртне куç ан ÿктĕр тесен карта çумне шăпăр тăратса хумалла.
  • Пыл хурчĕсем сывлăшра сĕрлесе çаврăнсан лайăх çанталăк пулать.
  • Вĕлле хурчĕ ĕрчетесси телей тăрăх теççĕ.
  • Пыл çинĕ хыççăн шыв ĕçсен хурт ăнмасть теççĕ.