Массăллă информаци хатĕрĕсем вĕçĕмсĕр асăрхаттараççĕ пулин те çынсем пурпĕр улталанаççĕ — Шалти ĕçсен министерстви çакнашкал преступленисем пирки куллен пĕлтерет.
Хаçатсем çине-çинех асăрхаттараççĕ, телекурав çынсем улталанни çинчен вĕçĕмсĕр пĕлтерсе сыхă пулма хистет — пĕри те тепри шăнман пăр çине ларса юлнин тĕслĕхĕ вара пурпĕр нумай.
Пĕлтĕртенпе "Власов следователь" Шупашкарти нумай çемьене шăнкăравлама ĕлкĕрнĕ. Пулăшас тĕллевлине пĕлтернĕ вăл. Чăннипе вара хăй пуйма тăрăшнă. Мĕнле-и? Çынсене тăванне уголовлă яваплăхран хăтарма укçа кирлине систернĕ. Именмесĕрех çĕр пин тенкĕрен пуçласа ытларах ыйтнă. Хăшĕ-пĕри ку ултав иккенне тавçăрайман... Тĕрĕссипе майĕ те пулман-тăр, ытла та çирĕппĕн калаçнă ултавçă.