Тăван çĕршывăн Аслă вăрçи тухнă çул вăл çиччĕре пулнă. Çав хаяр пулăм çинчен пĕлтернĕ куна ас тумасть. Ялта радио пулман. Ача-пăча хăй те вăрçăлла час-часах вылянă, çавăнпа çак сăмах пĕлтерĕшне чăна хуман.
Иртнине манма юрамасть. Халăхăмăрăн пурнăçĕнчи йывăр самантсене асра тытни пире пуç усмасăр малалла талпăнма вăй парса тăрать. Вăрçă нушине тÿссе ÿснĕ çынсен чăтăмлăхĕ, вăй-хавалĕ, пурнăçа юратни кĕçĕн ăрăва та çирĕпрех пулма хистет.
«Ĕмĕре пĕччен ирттерме Турри çырнă пуль», — çапла сăмах пуçарчĕç Тăвай районĕнчи Чутей ялĕнчи кинемейсем. Тĕрĕссипе, «вăрçă ачисен» çемье çавăрасси пирки шухăшлама вăхăт пулман.