Архив - Апр 2016 - Хыпар

Гладиолуса çу уйăхĕн 20-мĕ­шĕччен лартмалла. Чечек суханĕсене хуппинчен тасатмалла, чирлĕ вырăнĕсене касмалла, суранне зеленкăпа е марганцовка ирĕлчĕкĕпе сăтăрмалла. Ун хыççăн сухансене типĕтмелле, йывăç кĕлĕ сапмалла. Лартас умĕн 2 сехет марганцовкăн шĕвĕрех ирĕлчĕкĕнче тытмалла. Гладиолуссем пулăхлă, çĕрнĕ тислĕк хывнă çĕр çинче лайăхрах ÿсеççĕ.

Шултра сухансене — 10-12 сантиметр, вăтаммисене — 6-8, «ачисене» — 2-4 сантиметр тарăнăшне варăнтармалла. 1 тăваткал метр çинче шултра йышши 30 е вĕтĕрех 50 гладиолус ÿсме пултарать.

Пирĕн тăрăхра улма-çырла тĕмĕсене, йывăçсене кĕркунне те, çуркунне те лартма юрать. Çуркунне лартнă çамрăк хунава çу каçиччен мĕнле аталаннине сăнаса тăма аванрах. Йывăç-тĕмсене çулçăсем тухиччен лартма тăрăшмалла.

Пурăнмалли çурт тăррине тимĕр листасемпе витнĕ. Ăна сăрлас тетĕп. Çак ĕç йĕрки çинчен çырса пичетлеймĕр-ши?

Владимир ЯБЛОЧКИН.

Вăрнар районĕ.

Пĕлтĕр кĕркунне пахчана горчица акса хăвартăмăр. Кĕркунне вăл шăтса сип-симĕс ларчĕ, халь, çуркунне, пахча хуп-хурах, хĕл каçиччен çĕрсе кайнă. Кÿршĕсем те акнă горчицăна, вĕсен çĕнĕрен шăтса тухнă пек, пахчи сип-симĕс. Мĕне пĕлтерет-ши ку? Хăшĕ усăллăрах?

Н.СТЕПАНОВА.

Сĕнтĕрвăрри районĕ.

Йăран хатĕрленĕ чухне çак меслете шута илме сĕнетĕп, вăл чылайăшне килĕшет пулĕ тетĕп.

Кирек мĕнле пахчаçимĕç вăррине акмашкăн та йăрансем çине йĕрсем — канавсем — тăватпăр. Çав йĕрсене йывăç пăрăс таткипе кăштах пусарса тухмалла. Çак канавсене вăрлăха акмалла та çиелтен кăпăшка тăпрапа /ăна лайăх çĕрнĕ тислĕкпе хутăштармалла/ хупласа тухмалла. Пусарса тухнă йĕрсенче вăрлăх тикĕссĕн выртать, шăтасса та харăсраххăн шăтса тухать. Кăпăшка тăпрана акнă чухне вара вăрăсем тикĕссĕн ÿкмеççĕ, хăшĕ-пĕри çĕре шалаллах анса каять, çавна май вăрлăх тикĕс шăтмасть.

Элĕк райповĕн 3-мĕш аптека пунктĕнче профилактикăпа сиплев препарачĕсен ассортименчĕ яланах пуян. Наталья Егорова заведующипе Эльвира Чугунова фармацевт халăх ыйтăвĕсене туллин тивĕçтерме тăрăшаççĕ. Аптека пунктне автоматизациленĕ, тавара дисконт карттисемпе тата ятарлă акцисемпе йÿнетсе сутассине йĕркеленĕ.

Хĕл каçнă çĕрулмин шурă çамрăк çеçкине иртмелле. Унран питĕ паха шĕвек хатĕрлеме пулать. Çеçкене çумалла, çур литр банкине тултармалла, хĕрринченех шурă эрех е спирт, е сăмакун хушмалла. Ăшă тĕттĕм вырăнта 14 кун лартмалла. Настойка хатĕр.

Ангина аптратсан, çăвар ăшĕ шыçсан. Çур стакан ăшă шыва çĕрулми çеçкин настойкине 20 тумлам хушмалла. Шĕвекпе çăвара ирхине тата каçхине чÿхемелле.

Кариесран сипленме. Шăл пасти çине 3-5 тумлам настойка тумлатса шăл тасатмалла. Процедурăна ирхине тата каçхине тумалла.