— Шкул картишĕнче вылямалли лапам, спорт кĕтесĕ, канмалли лаптăк хатĕр. Çуртра — юмахри пекех. Урок хыççăн юлакан шăпăрлансем валли спальнăсем пур. Пĕчĕкскерсем çывăрĕç те. Занятисем хыççăн ачасем «Шахмат шкулĕнче», пултарулăх кружокĕсенче ăсталăха туптĕç, спорт секцийĕнче сывлăха çирĕплетĕç. Вĕсемпе А. Асламас ячĕллĕ искусство шкулĕн педагогĕсем, районти халăх пултарулăх çурчĕн специалисчĕсем, «Присурье» физкультурăпа спорт комплексĕн тренерĕсем ĕçлĕç. Кунашкал хăтлă шкулта камăн вĕрентес килмĕ? — терĕ Вера Николаевна.

— «Вĕрентÿ» наци проекчĕ пире тата тăрăшарах ĕçлеме хистет, хавхалантарать. Малашне çак тытăм палăрмаллах улшăнĕ, çĕнĕ шая çĕкленĕ. Паллах, вĕрентекенсен яваплăхĕ ÿсет. Ача-пăчана тарăн пĕлÿ парасси, анлă тавра курăмлă, çирĕп сывлăхлă тăвасси пиртен те килет, — терĕ Турайри шкул директорĕ Юрий Герасимов.