Комментировать

27 Дек, 2013

Арçынсем ăна юлма сĕнеççĕ

Шупашкар районĕнче çуралса ÿснĕ Елена Раевская ача чухне Çĕнĕ çула чăтăмсăррăн кĕтнĕ. Халĕ те çаплах. Юр Пике çи-пуçне тăхăнса уявсене çÿрекенскер çынсене, уйрăмах ачасене, савăнăç кÿме пултарнăшăн хĕпĕртет. Унччен те ăлкăра Юр Пике пулса курнăскер мĕн çинчен ĕмĕтленнĕ-ха? 24-ри Елена уявсене кайсан мĕнле пăтăрмахсене çакланнă?

- Çĕнĕ çул мероприятийĕсенче Юр Пике пуласси мĕнрен пуçланчĕ?

- Ун пек çÿрекен Хĕл Мучисемпе Юр Пикесем çинчен чылай çын илтнĕ-тĕр. Манăн та кăсăклану çуралчĕ, ачасене савăнтарас килчĕ. «Асатте» пулма пиччен юлташĕ килĕшрĕ. Пире укçа тÿленинчен те ытларах кĕçĕн çултисен хĕпĕртевĕ интереслĕччĕ. Уява 15 минутлăха пыма калаçса татăлсан та ытларах тăраттăмăр.

- Икĕ Çĕнĕ çулта сире хăнана миçе хутчен чĕнчĕç?

- Пĕлтĕр те, виçĕм çул та «ĕçе» раштавăн 23-мĕшĕнче пуçларăмăр. Кун каçипе вăтамран 3-4 киле çитеттĕмĕр. Пĕлтĕр Çĕрпÿ тата Шупашкар районĕсенче пурăнакан хăш-пĕр çемье йыхравларĕ. Тĕрĕссипе, районсене тухса çÿреме питĕ тăкаклă.

- Çĕнĕ çулăн тĕп хăнисем чăн-чăн маррине ачасем миçе çула çитсен пĕлеççĕ?

- Ултă çула çитнĕ ачасем иккĕленеççĕ, тĕлĕнерех пăхаççĕ. Паллах, эпир ĕнентерме, вĕсене хаваслă туйăм парнелеме тăрăшатпăр. Çи-пуçа та тĕплĕн хатĕрлетпĕр. 3-4 çултисемшĕн шур сухалпа унăн мăнукĕ чăннипех те пур. Пĕррехинче пĕр хĕр пĕрчи еплерех савăнчĕ, пире тахçанах кĕтнине хăйĕн чĕлхипе пĕрре мар каларĕ, пырса ыталарĕ.

- Хваттертен тухнă чухне кÿршисем хăйсем патне чĕнмеççĕ-и?

- Унашкалли те пулать. Уçă алăкран, çитĕннĕ çын хыçĕнче пăхса тăракан пĕчĕк ачана курсан ăна саламламасăр, парнепе савăнтармасăр епле тухса кайăн?

- Эсир садиксемпе шкулсене, килĕрен киле кăна мар, корпоративсене те çитетĕр. Каçхи уявсенчен епле кăмăлпа таврăнатăр?

- Кунашкал мероприятисене эпир çитнĕ тĕле пурте лайăх «хатĕрленеççĕ». Пурин те кăмăл лайăх. Карталанса тăраççĕ те симĕс чăрăш çинчен юрăсем шăрантараççĕ. Тĕрĕссипе, аслисем çапла хăтланнине курма хăнăхман эпĕ. Хăш-пĕр арçын Хĕл Мучине кайма хушса Юр Пикене юлма ыйтать.

- Эсир пĕр-пĕрне асăрхамасăр ятран чĕнни пулнă-и?

- Çук, йăнăшмалла ан пултăрччĕ. Уявра пĕчĕккисем кăна мар, çитĕннисем те пулаççĕ-çке-ха. Эпир юлташпа сценарие маларах хатĕрлетпĕр, вĕренетпĕр.

- Çĕнĕ çул асамлăхне е унпа çыхăннă тĕшмĕше ĕненетĕн-и?

- Эпĕ Хĕл Мучипе Юр Пике пуррине ĕненмесен те Çĕнĕ çул асамлăхĕн вăйне шанатăп, çавăнпа сехет йĕпписем Çĕнĕ çул пуçланнине пĕлтернĕ чухне ĕмĕтленетĕп. Анчах хăш-пĕр чухне темĕн çинчен те шухăшланăран мĕн ыйтнине те ас тăваймăн. Чи пысăк ĕмĕтсенчен пĕри - часрах çитĕнсе çемье çавăрасси тата ача-пăчаллă пуласси - пурнăçланчĕ. Хĕр ачасем нумай чухне çакăн пирки ĕмĕтленеççĕ мар-и-ха?

- Эсĕ Çĕнĕ çул уявĕпе киленме пултаратăн, ыттисене те савăк кăмăл парнелеме пĕлетĕн. Çак Юр Пике çуллахи шăрăх кунра епле пурăнать-ши?

- Эпĕ яланах хаваслă пулма тăрăшатăп. Сывă пурнăç йĕркине пăхăнатăп. Çывăх çыннăмсене Çĕнĕ çулта кăна мар, ытти чухне те савăнтарма тăрăшатăп.

Елена ТРОФИМОВА калаçнă.

CAPTCHA на основе изображений
Введите символы, которые показаны на картинке.