Комментировать

Чи тĕреклĕ чăваш арĕсем хăйсен пултарулăхĕпе вăйне XIX ĕмĕр вĕçнерех пасарлă пысăк ялсенче е çывăхри уес хулисенче ирттернĕ ярмăрккасемпе халăх уявĕсенче кăтартнă. Унашкал самант Никифор Мраньккан «Ĕмĕр сакки сарлака» романĕнче те пур. 30-40 çул каялла Куславкка районĕнче пурăннă сумлă таврапĕлÿçĕсем каланă тăрăх - асăннă романри тĕп сăнар - Энĕш шывĕ хĕрринчи ялта пурăннă Çтаппан Чулхулари тата Хусанти цирксенче тата ярмăрккасенче Атăл тăрăхĕнчи пăхаттирсемпе кĕрешсе тата кире пуканĕ йăтассипе тупăшса малти вырăнсене йышăннă.

Штанга йăтассипе Совет Республикин 1918 çулхи март варринче Мускавра йĕркеленĕ 1-мĕш чемпионатĕнче пурĕ те 15 атлет кăна вăй виçнĕ. Чăваш Енре штангистсемпе кире пуканĕ йăтаканĕсен чемпионачĕсене Тăван çĕршывăн Аслă вăрçиччен нихăçан та ирттермен.

Йывăр атлетика иртнĕ ĕмĕрĕн 50-мĕш çулĕсенче çартан таврăннă вăйлă та хастар салтаксемпе саппасри офицерсем пуçарнипе аталанма пуçланă. 1952 çул пуçламăшĕнче Чăваш Енĕн тĕп хулинче ирттернĕ пирвайхи турнирсенче малти вырăнсене Шупашкарти тĕрлĕ предприятире ĕçленĕ В.Филиппов, В.Веденский, Г.Долбилин, И.Агафонов, Çĕмĕрлери В.Леонов тата Саратоври ветеринари институчĕ хыççăн Канаш районне ĕçлеме килнĕ В.Захаров йышăннă. Çав çулсенчех Шупашкарти «Динамо» спорт çуртĕнче штанга йăтакансен тата боксерсен секцийĕсем уçăлнă. 1964 çулхи февральте йывăр атлетика енĕпе иртнĕ республика чемпионатĕнче 60 килограмлă виçере Елчĕк районĕнчи Тÿскел ялĕнче çуралса ÿснĕ, Чăваш патшалăх педагогика институчĕн физикăпа математика факультечĕн 19 çулти студенчĕ А.Зайцев çĕнтернĕ. Адольф Селиванович тивĕçлĕ канăва тухичченех Канашри тĕрлĕ шкулта тата медицина училищинче преподавательте ĕçленĕ. Малалла вулас...