Публицист шухăшĕ

Пире кашнинех чăваш ялĕн шăпи, сăн-сăпачĕ, пуласлăхĕ шухăшлаттарать. Çапла пулмасăр, эпир унтан тухнă-çке. Хулара пурăнатпăр пулин те чунăмăрсем унталлах туртăнаççĕ. Юратнă Чăваш Енĕмĕрте паян пин те çичçĕре яхăн ял. Темĕнли те пур вĕсен йышăнче: аталанаканни те, пурнăçпа тан «утаканни» те, пĕтекенни те, лаштра йăмралли те, йывăçсăрри те, пĕве йышлă пулнипе палăраканни те, ача сачĕ, шкул е культура вучахĕ çуккипе нушаланаканни те...

Шкулта вĕреннĕ çулсенче хамăра "çĕнĕ пурнăç калчисем" тесе каланине тăтăшах илтме тÿр килетчĕ. Этеме ÿсен-тăранпа танлаштарни ăнăçлах та мар-и тен, çапах ку сăмах çаврăнăшĕ чĕрене темĕнле ырă варкăшпа витеретчĕ. Пурнăç малашне тата илемлĕрех, тĕнче çутăрах, çынсем ырăрах пулассăн туйăнатчĕ-ши? Çитĕнтĕмĕр. Самани ача чухнехинчен чăнах та урăхларах. Шел, "калчисем" те... Хамăра ăс-тăн панă аслă ăру шанăçне тÿрре кăларайрăмăр-и? Сочиненисенче шăрçаланă шухăшсен ытларах пайне пурнăçа кĕртеймерĕмĕр вĕт.