Новости по теме

Раççейре грипп эпидемийĕ нарăс уйăхĕнче пуласса тухтăрсем малтанах систернĕччĕ. Сысна грипĕ çĕршыври темиçе регионта анлă сарăлнă.

Чир Чăваш Ене те çитнĕ. Кăрлачăн 26-мĕшĕ тĕлне республикăра сысна грипĕпе 17 çын аптăранине палăртнă. Вĕсен сывлăхĕ хăрушлăхра мар, çапах тухтăрсем пурне те асăрхануллă пулма, иммунитета çирĕплетме сĕнеççĕ. Пĕтĕмĕшле илсен, кăрлач уйăхĕн 15-21-мĕшĕсенче Чăваш Енре гриппа тата ОРВИпе аптăракан 5,6 пин çынна палăртнă. Ытларах Шупашкарта, Çĕнĕ Шупашкарта, Улатăрта чирлеççĕ. Уйрăмах - ачасем. Хальлĕхе республикăра пĕр шкула та карантина хупман.

Граждан обществин аталанăвĕн фончĕ кĕпĕрнаттăрсен 2015 çулхи эффективлăхĕн рейтингне çирĕплетнĕ. Унăн кăтартăвĕсемпе сакăр субъект ертÿçин ĕç-хĕл тухăçлăхĕ ÿснĕ. 11 регион пуçлăхĕ хăйсене шанса панă регионсенче управлени ĕçне 2014 çулхинчен япăхрах туса пыни палăрнă.

Чăваш Республикин парламенчĕн ĕнер иртнĕ черетлĕ 35-мĕш сессийĕнче Чăваш Ен Пуçлăхĕ Михаил Игнатьев Патшалăх Канашне тата Чăваш Ен халăхне янă Çырăвĕпе паллаштарчĕ.

Вадим НИКОЛАЕВ, РФ Федераци Пухăвĕн Федераци Канашĕн членĕ:

- Чăваш Ен Пуçлăхĕ Çырура юлашки çулсенче республикăра тунă ĕçсене тарăн тишкерчĕ, регионăн экономикăпа социаллă пурнăç аталанăвне, çавăн пекех сывлăх сыхлавĕ, вĕрентÿ тата ытти тытăм мĕнле тăрăмра пулнине хак пачĕ. Çĕршыври лару-тăру çăмăлах мар пулин те - тулашри санкцисене пула экономикăра чылай йывăрлăх тухса тăчĕ - Чăваш Енĕн çитĕнÿсем пур. Регион Ертÿçи вĕсене те асăнчĕ. Вăл кашни отраслĕн тĕллевĕсене палăртрĕ. 2016 çул - Чăваш Енре Ĕç çыннин çулталăкĕ. Михаил Игнатьев ĕç çыннине пулăшмаллине аса илтерчĕ, мĕншĕн тесен ĕç - обществăн аталану никĕсĕ. Эпир пĕр-пĕрне пулăшса та ăнланса ĕçлесен республикăмăр малашне те хальхи пекех тăнăçлă аталанса пырĕ.