Иртнĕ эрнере Мускавра пулнă та — ĕç тăвакан влаç органĕсен тата муниципалитетсен ертÿçисемпе тунтикунсерен ирттерекен канашлăва ЧР Пуçлăхĕ Олег Николаев тĕп хулари ĕçлĕ тĕл пулусем çинчен пĕлтернинчен пуçларĕ.
Пĕтĕм Раççейри «Ĕç-хĕл отраслĕн тухăçлă аталанăвĕшĕн» ăмăртăва пĕтĕмлетнĕ.
Конкурса потребитель кооперацийĕн Раççей Центрсоюз тытăмĕн регионсенчи пĕрлешĕвĕсем хутшăннă, вĕсен 2020 çулхи 3-мĕш кварталĕнчи ĕç-хĕлне хакланă.
Чăвашпотребсоюз розницăллă суту-илĕве аталантарнăшăн — 1-мĕш, хатĕрлев ĕçне аталантарнăшăн — 1-мĕш, пĕрлештернĕ закупкăсене хутшăннăшăн — 3-мĕш, Атăлçи федераци округĕнчи союзсен пĕрлехи ĕç-хĕлне аталантарнăшăн 1-мĕш вырăнсене тивĕçнĕ.
ЧР Тĕп суйлав комиссийĕ территорисенчи суйлав комиссийĕсен çĕнĕ йышне йĕркелес енĕпе ĕçлет. Çак йыша пилĕк çуллăха палăртаççĕ.
Тĕп суйлав комиссийĕн председателĕ Александр Цветков пĕлтернĕ тăрăх, территорисенчи суйлав комиссийĕсен малтанхи йышĕн полномочийĕсем вĕçленнĕ, çавăнпа çĕнĕ йыша йĕркелеççĕ. Чăваш Енре 28 комисси пулмалла, вĕсенче кашнинче — 9-12-шер çын.