Чĕр чун тусĕ

Вăхăт ывăнма пĕлмест, юханшыв пек малтан мала ыткăнать. Самантлăха та пулин чарăнасчĕ... Çук. Этем те çавах мар-и? Вăл та малаллах васкать. Утать те утать пурнăç çулĕпе, ватлăх хăваласа çитнине те сисмест.

— Эпĕ хам çуралнă çурта тата ачалăха лайăх ас тăватăп. Пирĕн йăх ĕçченлĕхпе палăрса тăнă. Атте те, анне те çĕр çинче тăрăшнă. Çарран чупнă чухнех атте вĕрентсе каланă сăмахсем асра: «Ĕçлеме ан ÿркенĕр, çĕрпе туслă пулăр», — тетчĕ вăл, — аса илет иртнине утмăл урлă каçнă Иван Вазюков.