Тĕнчере хăй мĕнле тивĕçе пурнăçласса малтанах кам пĕлет? Вăхăт кăна пурăна киле йăлтах уçăмлатать. Етĕрне районĕнчи Ирçе ялĕнче çуралса ÿснĕ Виктор Егоров, ÿнер тĕнчинче Аванмарт хушма ятпа палăрнăскер, хăйĕн пурнăçĕнче Ă сас паллине халалласа палăк лартасса /хăй çуралса ÿснĕ кĕтесре тахçан Ăлкино ялĕ пулнине асра тытса/ кам шухăшласа илме пултарнă? Пултаруллă хăйне евĕр скульптор темиçе çул каяллах ырă йăла пуçарнă: «Аванмарт премийĕн» çулталăкри хуçине палăртать те черетлĕ лауреата сертификатпа тата хăй ăсталанă кÿлепепе чыслама васкать.