Archive - 2013 - Хыпар

Çанталăк сивĕтме пуçларĕ, çавна май эпир пурте килте ăшă пултăр тесе тăрăшатпăр. Шăпах çак тапхăрта пушар шучĕ палăрмаллах ÿснине пĕлтереççĕ çăлавçăсем. Теприсем тата юхан шывсемпе кÿлĕсене пăр ларнă-ларман ун çине кĕрсе шар кураççĕ. Çанталăк сивĕтме тытăннă май инкек ытларах тухни пирки Чăваш Ен Пуçлăхĕ Михаил Игнатьев районсемпе хуласен администрацийĕсен пуçлăхĕсемпе çак кунсенче ирттернĕ видеоконференцире те пăшăрханса каларĕ, çавна май муниципалитет ертÿçисен уйрăмах тимлĕ пулмаллине аса илтерчĕ. Михаил Васильевич ку енĕпе профилактика мерисене вăйлатма сĕнчĕ.

Министрсен Кабинечĕн ĕнерхи ларăвне ЧР Пуçлăхĕ Михаил Игнатьев Патшалăх Канашĕн ертÿçисене, депутачĕсене тав тунинчен пуçларĕ. Сăлтавĕ - виçĕм кун вĕçленнĕ сессире парламентарисем республикăн çитес виçĕ çуллăх бюджетне йышăнни. «2014 çула финанс докуменчĕпе кĕретпĕр, - кăмăллăн палăртрĕ Михаил Васильевич. - Халĕ Правительствăн тивĕçлĕ йышăнусем хатĕрлемелле. Бюджетра пăхса хăварнă укçапа туллин тата вăхăтра усă курассине тивĕçтермелле. Строительствăпа çыхăннă ĕçсем тăсăлса ан кайччăр - 1-мĕш кварталтах ĕçе тытăнмалла пултăр. Вăхăтра пурнăçланине хам тĕрĕслесе тăрăп».

Черетлĕ ĕçлĕ çул çÿреве тухсан ăнсăртран тĕл пулнă çамрăк хĕрарăмпа тăван чĕлхепе шăкăл-шăкăл калаçатпăр. Хальхинче çул Канаш тăрăхĕнчи Карăклă ял тăрăхнелле выртрĕ те - кунти хутлăх, халăх çинчен, вĕсен ĕçĕ-хĕлĕ, çивĕч ыйтăвĕсем пирки пĕлесшĕн тăрăшатăп. Çулташăм Надежда Федорова хăй ку тăрăхра çуралса ÿсмен пулин те мана мĕн кăсăклантарни пирки йăлтах каласа кăтартма пултарчĕ.

- Хĕр ача ашшĕне пăхсан телейлĕ пулать тенине илтнĕччĕ, манăн мăшăрăм Мария та пур енĕпе те хуньăма хывнă. Телей юнашарах, - тенĕччĕ пĕррехинче Кĕçĕн Арапуçĕнчи хисеплĕ ватă В.Селиванов.

Чÿк уйăхĕн 1-мĕшĕнче Мария Семеновнăпа Василий Михайлович Селивановсен килĕнче ылтăн туй кĕрлерĕ.

Хĕрсен шăпи çапла: ÿссе çитсен качча тухаççĕ /шăпа ăçта çитерессе маларах никам та пĕлмест/. Курман-илтмен çынсемех кÿршĕллĕ пулаççĕ, мĕн ватăлса виличченех килĕштерсе пурăнаççĕ. Пĕр çемьери пек. Хаçатăн паянхи номерĕнче Хĕрлĕ Чутай районĕнчи Анат Çĕрпÿкасси ялĕнче юнашарах пурăнакан Зоя Александровна Красновăпа тата Зоя Кирилловна Димитриевăпа çывăхрах паллаштарасшăн.

Чăваш Енре пысăк ăмăрту чылай иртет. Хальхи вăхăтра Шупашкар командăсен Европа чемпионатне хатĕрленет. Нумаях пулмасть пирĕн республикăра 2016 тата 2018 çулсенче хăвăрт утакансен тĕнче кубокĕсене ирттерессине пĕлтĕмĕр. Çак кунсенче Çĕнĕ Шупашкарти Олимп резервĕсен ятарлă 3-мĕш спорт шкулĕн керменĕнче ирĕклĕ мелпе кĕрешекенсем çĕр-шыв кубокĕшĕн тупăшрĕç.

Чăваш Ен - спортпа туслисен регионĕ

Шурă Шупашкарăн пултарулăх кун-çулĕ нумай енлĕ тата питĕ хăйне евĕрлĕ. Ун пирки вĕçĕмсĕр калаçма пулать. Манăн юлашки тапхăрти пулăмсем çинче чарăнса тăрассăм килет.

Юлашки 20 çулта пурнăç çав тери хăвăрт улшăнчĕ. Урăх самана илсе килчĕ вăрăмах та мар çак тапхăр. Ку пур енĕпе те сисĕнет. Илемлĕ литературăра та. Чăваш çыравçисене вара питĕ вирлĕн пырса çапрĕ вăл. Тахçан питĕ хисеплĕ пулнă йыш ăçта кайса кĕчĕ? Сăлтавĕ те пур-ха. Хамăр та айăплă: такама чап, ят кирлĕрен виççе пайланса кайрĕ-çке союз. Илсе тултарчĕç хăйсен йышне такама та, халĕ никам та пĕлмест çыравçăсем мĕн чухлине. Писательсен пĕрлĕхĕ тăватта та пайланма пултарнă - вырăсла çыраканнисенне тата.

"Авангард" обществăн "Çĕрпÿ беконĕ" филиалĕ Ял хуçалăх тата тирпейлекен промышленноç ĕçченĕн кунне паллă тума хатĕрленсе техника хатĕрне юсамалли çурт туса пĕтернĕ.

Кунта - токарь станокĕсем, тимĕрç лаççи, аккумуляторпа саппас пайсен пÿлĕмĕсем, трактор-машинăна кĕртсе тăратмалли ăшă цех, ашлăх сысна турттарса кайма республика тулашĕнчен килекенсем валли хăналăх 10 вырăн, çăвăнса тасалмалли пÿлĕмсем.

Ачасен пĕтĕм тĕнчери кунне халалласа Хĕрлĕ Чутай районĕнче вĕренÿпе спортра палăрнисен пĕрремĕш слечĕ иртрĕ. Олимпиадăсемпе конкурссен çĕнтерÿçисем, спорт ăмăртăвĕсенче мала тухнисем культурăпа кану центрне пуçтарăнчĕç.