Archive - 5 Ака, 2014 - Хыпар

«Васкавлă пулăшу» машинисем чирлĕ çын патне вăхăтра пыманни, çакă техника кивелнипе тата вăл çитменнипе çыхăнни çинчен хаçатра пĕрре кăна мар çырнă. Ку ыйту нумайăшне чăннипех канăçсăрлантарнă. Акă пăр тинех тапранчĕ темелле. «03» служба йывăр чирленĕ çынна малашне нумай кĕттермĕ...

Чăваш Ен Пуçлăхĕ Михаил Игнатьев Шупашкар хула пуçлăхĕпе Леонид Черкесовпа пĕрле «Водоканал» АУОпа «НПП Бреслер» ОООна çитсе курнă.

Ака уйăхĕн 2-мĕшĕнче Чăваш Ен Пуçлăхĕ Михаил Игнатьев РФ Правительствин Председателĕ Дмитрий Медведев ирттернĕ видеоселектор канашлăвне хутшăннă.

Иртнĕ уйăх вĕçĕнче республика ертÿлĕхĕ ЧР Министрсен Кабинечĕн ĕç-хĕлне, çавăн пекех Чăваш Енĕн 2013 çулхи бюджетне епле пурнăçланине пĕтĕмлетнĕ. Социаллă пурнăçпа экономика, финанс кăтартăвĕ пĕтĕмĕшле лайăхланнине палăртнă.

Тăван çĕр-шывăн Аслă вăрçин пирĕн халăхăн Çĕнтерĕвĕпе вĕçленнĕ кунĕ историре аяккарах кайса пырать пулин те унăн пĕлтерĕшĕ нихăçан та сĕвĕрĕлмĕ. Рейхстаг çинче хĕрлĕ ялав çĕкленĕренпе кăçал 69 çул çитет. Пысăк çухатупа килчĕ çу уйăхĕнчи хĕвеллĕ çав кун.

«Нина Васильевнăна чылайранпа пĕлетĕп, - тет районти социаллă пулăшу пайĕн ертÿçи Ирина Смолина. - Ылтăн кăмăллă та ăш пиллĕ хĕрарăм вăл. Йывăр шăпаллă çынсене яланах пулăшать. Куç курманнисен обществин членĕсемпе туслă çыхăну тытать, унти мероприятисене йĕркелемешкĕн пуçаруллă хутшăнать, концертсенче пултарулăхĕпе савăнтарать. Сăвăсем çырать вăл, юрра-ташша ăста. Хевтесĕрсене телей парнелемешкĕн ырă чунлă пулмалла. Кăмăлĕ вара пурне те хăй хÿттине илмешкĕн çителĕклĕ, вăй-халĕ тапса тăрать...»

«Йыснана пулăшас терĕм те»

Кашни арçыннăн çемьеллĕ пулса кил-çурт çавăрмалла тенĕ халăхра. Паллах, пÿрт-хуралтă лартасси çăмăл мар. Анчах харпăр хăй йăвинче мăшăрĕпе, ывăл-хĕрĕпе килĕштерсе те тату пурăнас ĕмĕтлисем йывăрлăхсене çĕнтереççех. Самана улшăнăвĕ пирĕн тăрăхри ялсене те çĕнĕлĕх кĕртрĕ.

«Раççее демографи катастрофи кĕтет!» - пăшăрханса пĕлтернĕ Екатеринбургра иртнĕ ача çуратассин ыйтăвĕсене халалланă конференцире. Унăн ĕçне паллă ăсчахсемпе медицина ĕçченĕсем, общество деятелĕсем хутшăннă.

Вĕсем палăртнă тăрăх - 2025 çул тĕлне пирĕн çĕр-шывра 20-29 çулсенчи хĕрарăмсен йышĕ хальхинчен икĕ хута яхăн чакма пултарать. Ача çуратас ÿсĕмрисем паян 12 миллиона яхăн тăк - тепĕр вун пĕр çултан 6 миллионăн юлĕç. Демографи лару-тăрăвне лайăхлатмашкăн кашни çемьере виçĕ ачаран кая мар çитĕнмелле.

Сочири Паралимп вăййисенче Раççей чысне Елчĕк районĕнчи Элпуç ялĕнче çуралса ÿснĕ Елена Александрова мăнукĕ Дмитрий Лисов хоккеист та хÿтĕленĕ. Çакăн çинчен пире редакцие унăн иккĕмĕш сыпăкри пиччĕшĕ, Тăрмăш ялĕнче пурăнакан ĕç ветеранĕ В.Щербаков пĕлтерчĕ.

"Русская песня" ансамблĕн илемлĕх ертÿçи Надежда Бабкина Шупашкарти Трактор историйĕн музейне çитсе курнă. Хăй вăрттăн пĕлтернĕ тăрăх - вăл юрă-ташă ăсти çеç мар, ял хуçалăх техникипе те çывăх пулнă çын.