Кун пек те пулать

18 Пуш, 2017

Киленÿ тыткăнĕнче

Эпир ялта хунямапа пĕрле пурăнатпăр. Вăл мана хăйĕн хĕрĕ пек юратайманнине лайăх ăнланатăп. Мăнукĕсемшĕн чун ăшшине ан шеллетĕр — маншăн çакă пĕлтерĕшлĕрех. Килти пур ĕçе те хам тума хăнăхнă. Çурта çĕнетес тесе качча тухсанах картиш тулли выльăх усрама пуçларăмăр. Упăшка укçа ĕçлесе илес тĕллевпе Мускав çывăхĕнчи пĕр предприятие вырнаçрĕ. Вахтăпа çÿрекенскер çуршар уйăхлăха килтен тухса каять. Ывăлĕ ĕçленĕ вăхăтра хуняма хĕрĕсем патĕнче хăналанать. Уншăн ÿпкелешместĕп, кайтăрах.

11 Пуш, 2017

Качака шырама кайсан...

Ăратлă качака шыраса кÿршĕ яла кăна мар, кÿршĕ района та мар, республикăн тепĕр вĕçнех çитмелле пулчĕ. Çул çÿресе вăхăта çеç сая ятăм тесе ÿпкелешме сăлтав çук: ывăнни тухăçсăр мар — ĕç кăлартăмах. Хуçасене пĕр-икĕ качака путеккине ман валли ÿстерме çăмăллăнах ÿкĕте кĕртрĕм.

10 Раштав, 2016

Çывăрма памаççĕ

Общежитири хĕрсемпе туслă пурăнатпăр. Ĕнер те çĕрлечченех пĕр-пĕрин патĕнче хăналаннă. Пĕри — яшка, тепри çĕрулми нимĕрĕ пĕçернĕччĕ. Эпĕ юлашкинчен пурне те типĕтнĕ улма-çырла компочĕ ĕçтертĕм. Вĕсем уншăн та савăнчĕç.

Ирхине алăкран такам шакканипе вăрантăм. Çывăрма памаççĕ. Кама кирлĕ эпĕ çак сехетре? Вăйлă сасă кăлараканскер пăрăнса утмасть. "Пÿлĕмре кам та пулин пур-и? Уçăр!" — тархасласах ыйтать хайхискер. Çав çын мĕн çăмăлпа çÿренине питĕ пĕлес килет. Вахтăран кам кĕртнĕ-ши?

3 Раштав, 2016

Упăшка алă çинче йăтса çÿрет

Кукамай патне хăнана çÿреме юрататтăм. Вăл, вăрçă вăхăтĕнче çитĕннĕскер, укçине хытă тытатчĕ. Çапах пирĕншĕн, мăнукĕсемшĕн, юлашки тенкине кăларса пама хатĕрччĕ. Ăна тÿрех лавккана çавăтса каяттăмăр. Вăл пире канфет-пĕремĕк, ручка-кăранташ, çи-пуç илсе паратчĕ. Лайăхчĕ унăн ытамĕнче. Çакăнтах Олегпа паллашрăм. Клубра утăм тума памастчĕ вăл мана. Киле пĕрле таврăннă чухне те сăмах сыпăнман пирĕн. Килĕшмен çынпа мĕн сÿтсе явăн? Вĕçкĕнсене ачаранах чăтма пултараймастăп. Тата хамран çÿллĕрех каччăсенчен те пăрăнса иртес килет. Олег вара лутра та типшĕм кĕлеткеллĕ.

15 Юпа, 2016

Тĕлпулăва арăм килчĕ

Вăл каçхине эпĕ яланхиллех хамăн юратнă кресло çине вырнаçнăччĕ, телевизор пăхаттăм. Юнашар — юратнă кушакăм. Вăл та çамрăк мар ĕнтĕ. Пĕр хушă шухăша путрăм: виçĕ уйăхран пенсие тухатăп. Мĕн тăвăп-ха малашне? Çу кунĕсенче пахчара кĕшĕлтетĕп-ха. Хĕлле вара?

Уйăх каялла çеç-ха «паллашас кăмăл пур» текен пĕлтерÿсенчен кулаттăм. Акă паян хам та çакнашкаллине çырма лартăм. Ку маншăн çывхаракан пĕчченлĕхрен хăтаракан хăйне евĕр çăлăнăç карапĕ пулса тăчĕ.

Pages