Паян "Хыпар" Издательство çурчĕн журналисчĕсем Пĕтĕм чăваш диктантне хутшăнчĕç. Ытти чухне те алăран калем яманскерсем хăйсен пĕлĕвне халăхпа пĕрле тĕрĕслеме шут тытрĕç. Текста Чăваш наци радиовĕн тата "Тăван радио" эфирĕсенче вуланă май хаçатçăсем ĕç пÿлĕмĕнче ларсах диктант çырчĕç.
Раççей Ют çĕршыв ĕçĕсен министерствин Йышăну çуртĕнче паян Чăваш Ен презентацийĕ уçăлнă. Унта РФ ют çĕршыв ĕçĕсен министрĕ Сергей Лавров, Чăваш Ен Пуçлăхĕ Михаил Игнатьев хутшăннă.
Шăмат кун, ака уйăхĕн 22-мĕшĕнче, И.Н. Ульянов ячĕллĕ Чăваш патшалăх университечĕн медицина факультетĕнче ваканси ярмăркки иртнĕ. Унта паян-ыран шурă халат тăхăнма хатĕрленнисем тата интернсемпе ординаторсем - пурĕ 300 ытла çамрăк - пуçтарăннă.
Ĕнер Шупашкар районĕнчи "Волжские зори" кану базинче "Чăваш Енĕн ахахĕсем" конкурс-фестивалĕн гала-концерчĕ иртнĕ. Унта юрă-ташă енчен пултаруллă ачасем пуçтарăннă.
Ăмăртăвăн зонăри тапхăрĕсем маларах Куславккара, Канашра, Патăрьелĕнче, Çĕмĕрлере, Хĕрлĕ Чутайĕнче тата Кÿкеçре иртнĕ. Ĕнерхи гала-концертра сцена çине тухнисене тĕрлĕ дипломпа, медальпе, ятарлă кубокпа чысланă.
Чăваш патшалăх академи драма театрĕ пысăк çухату тÿснĕ - чăваш сценин хальхи вăхăтри çутă çăлтăрĕсенчен пĕри, куракансен юратакан артисчĕ Геннадий Большаков вилнĕ.
Ака уйăхĕн 22-мĕшĕнче Шупашкарти Ача-пăчапа çамрăксен пултарулăх керменĕнче республикăри педагог профессийĕн ăсталăхне палăртакан конкурссен пĕтĕмлетĕвĕ иртрĕ.
Йывăç лартмалли Пĕтĕм Раççейри акцие хутшăнса Чăваш Енре паян йывăç лартма палăртса хунăччĕ. Анчах ака уйăхĕн 20-мĕшĕнчи асар-писер çил-тăман хыççăн ырă çак ĕçе каярах вăхăта куçарма йышăннă.
Чăваш Ен Пуçлăхĕ Михаил Игнатьев паян Шупашкар тата Чăваш Ен епархийĕн митрополитне Варнавана çуралнă кунпа саламланă.
Михаил Игнатьев Варнавăна Вырăс православи чиркĕвĕн ырлăхĕшĕн нумай çул ĕçленĕшĕн тав тунă. Митрополита вăл пĕлтерĕшлĕ социаллă ыйтусене татма, нацисем тата религисем хушшинчи туслăха çирĕплетме тÿпе хывнăшăн ырăпа палăртнă. "Эсир епархие ертсе пынă вăхăтра ăс-хакăлпа культура йăли-йĕркине упраса хăварма нумай ĕç тунă", - тенĕ Михаил Игнатьев.
Коммуналлă хытă каяш ыйтăвĕпе паян Шупашкарта çавра сĕтел иртнĕ. Ăна Чăваш Енĕн Общество палати, "Пĕлÿ" Раççейри обществăн республикăри организацийĕ, И.Н. Ульянов ячĕллĕ Чăваш патшалăх университечĕн историпе географи факультечĕн геоэкологи кафедри, хулари Маяковский ячĕллĕ библиотека тата Вырăс географи обществин республикăри организацийĕ ирттернĕ.